迭能样子个“小书摊”，辣拉上海恐怕已成了绝版。阿拉讲个“小书”,就是大家熟悉个连环画，上海人俗称为“小人书”，或者“小书”。
上世纪五十年代前，几乎每条弄堂口侪有迭样子个“小书摊”。书摊侪有一排或几排书架，书架由木板制成高二米，宽一米左右个框架，两片框架用铰链连接，可以像书本一样合二为一，便于搬运或收藏。摊前放仔几条长凳或小矮凳。看书个大都是小囡，难板也有一眼大人，但老少个。搿个辰光还呒没电视，更加呒没电脑搭仔网络，就是现在看来邪气普通个收音机，也还只是小康人家或大富人家个奢侈品。图书馆老少，属于儿童个图书馆更加是少之又少，乃末小书摊就是阿拉童年常常光顾个乐地了。迭些小书，一分洋钿可看两本，侬晓得，辣拉当时三分洋钿可买一只大饼搭仔一根油条，对于贫苦人家讲起来，迭个还是一笔勿小个开支。有个摊主为了赚钞票，还拿稍厚个一本连环画拆成共两本出借。
我跟一眼小朋友为了看小人书，就常常拿爷娘拨阿拉个早饭铜钿省下来去看书。搿个辰光学堂里呒没啥个课外活动，放学以后阿拉就钻到小人书摊里，读到兴起头，甚至忘了吃饭，有常时还拨爷娘骂山门，弄得勿好还会吃顿生活。阿拉有辰光还会得拿小人书借到屋里向，不过钞票要多付一倍了。摊主也只肯借拨熟客，并不收押金。有常时碰着伊开心，还会多借几本拨侬。就是这眼“小人书”拿我引向爱好文学搭美术之路。小人书有个改编于《三国演义》、《西游记》等名著；有个改编于武侠或传奇小说。看完迭些小人书，让我对经典名著产生了极大个兴趣，很想去了解迭些历史。至今我还记得迭眼我欢喜个老画家个名字：赵宏本、钱笑呆、陈光镒、严绍唐……我只要一看画页，就晓得迭个是啥个画家个作品：赵宏本、陈光镒个画笔细腻传神，严绍唐画风粗犷流畅，而且专画历史故事，而钱笑呆则擅长画才子佳人，他画个美女眼神老特别个，一看就晓得伊个风格。小辰光我特别喜欢临摹小人书上个人物，也由此爱上了画图。
现在个小囡老早勿晓得啥叫“小书摊”了，但伊拉现在迷恋动画，大概跟阿拉当年痴迷小人书一样陶醉，幸运个是，伊拉勿必再省钞票饿肚皮去得到迭能个享受了。作者：徐赋葆
(来源：新民晚报)
上一条:
收藏连环画须“十防” 下一条:
文革时，他从大火里抢出“小人书
沪公网安备 31010602000774号 
| 
